بِسْمِ اللّهِ الرَّحْمـَنِ الرَّحِيمِ
اللَّهُمَّ صَلِّ عَلَى مُحَمَّدٍ وآلِ مُحَمَّدٍ
ركضة طويريج
يا حسين مولا
ركضة طويريج من يمحيها والامام المهدي يحضر بيها
يا حسين مولا ...يا حسين مولا
ركضة طويريج توجها الفخر للوفا والتضحية شبيها صور
ما يماثلها عزا بكل الدهر ينور حاضرها بشمس ماضيها
يا حسين مولا......يا حسين مولا
منها صرخة ويا حسينا ترتفع صرخة حتى العرش منها ينفجع
مستحيل الركضة هذي تنمنع الله يخذل كلمن يعاديها
يا حسين مولا.....يا حسين مولا
الها راية ارتفعت بعلو النجوم ما يهمنا الي يعارضنا ويلوم
يروي هذا الخبر عن بحر العلوم المهدي بيها دمعته يجريها
يا حسين مولا......يا حسين مولا
شافوا المهدي يهل دمعة العين وعلى راسه حيل يلطم بالايدين
مع الركضة يدخل لصحن الحسين وعلى جده صرخته يعليها
يا حسين مولا......يا حسين مولا
يذكر الصار وجرى بطف كربلا والمصيبة كباله تصبح ماثله
ذهنه يتصور فرار العائلة ويذكر شلون العدا توليها
يا حسين مولا.....يا حسين مولا
بركضة طويريج يا جدي اجيت طفت شباجك بحسراتي وبجيت
مثل حنوك على العباس انحنيت حين طاح وهامته مهشميها
يا حسين مولا ......يا حسين مولا
كعدت عد راسك ارادف حسرتي سهم جبدك جن اهيسه بجبدتي
كمت اتصور لزينب عمتي من عكب عيناك يا واليها
يا حسين مولا.......يا حسين مولا
شلون من نوحي عليك اهجع واهيج وانت يا جداه محزوز الوريد
ويمك وليدك علي الاكبر شهيد بالمواضي جثته مخذميها
يا حسين مولا......يا حسين مولا
اه يا سلوة الزهرة الطاهرة موقفك يا جدي جن اتصوره
شفت طفلك حين كطعوا منحره نبلة جانت بالسم مخليها
يا حسين مولا......يا حسين مولا
للخيم جبته وتكفكف دمعتك عمتي زينب بلوعة تلكتك
وين عبد الله بدمعها نشدتك ظنتك سالم ترجعه ليها
يا حسين مولا.......يا حسين مولا
اه يا جدي اشفت بالطف محن من البواجي دموعك عليهن صفن
من شفت جاسم الشاب ابن الحسن جفوفه من فيض الدما محنيها
يا حسين مولا......يا حسين مولا
نهار عاشر ما جرى مثله نهار شفت بيها تذبحت كل الانصار
والخيم يا جدي تتلاهب بنار وانت ما تكدر تجي تطفيها
يا حسين مولا.......يا حسين مولا
اذكرك بالمصرع تدير النظر عالخيم نوبة ونوبة على النهر
تريد تنخى جنك حزام الظهر عالشريعة جفوفه مكطعيها
يا حسين مولا......يا حسين مولا
جيتك انه اليوم هذي طلبتي بجاهك الباري يعجل طلعتي
راية العباس تصبح رايتي كون كل العادتك افنيها
يا حسين مولا......يا حسين مولا
الشاعر.... أبو فاطمة العبودي
الرئيسية 
